تعودت اجامل غيري واخفي هموم البال

تعوّدت اجامل غيري واخفي هموم البال
على شان اكون بخير ولابيّن احزانـي
من اسنين قلبي يارفيقي على هالحـال
قليل التشـرّه بيـن ربعـي وخلانـي
لو ان الهموم اللي بقلبي تهـد اجبـال
تصاغر بعيني والرجـاء دوم يغشانـي
اشوف الأمل غيمة مطر بارقه همّـال
واشوف الأمانـي كنّهـا ورد بستانـي
إذا ضاق صدري يوم جرّيت لي موال
اردد قصيـدي لانظمـتـه بقيفـانـي
مادام إن عندي كل عقده لهـا حـلاّل
اسايـر زمانـي لونصيبـي تبـلانـي
قليل الكلام ولاني اسمع لقيـل و قـال
اثمّن كلامي دوم والسانـي احصانـي
اعاتب خطا نفسي ولاعاتـب العـذال
و لاهمنـي ماقالـه افـلان وافـلانـي
لقيت الصبر مفتاح الأفراج مهما طـال
ترى اللي يوسع خاطره دوم ربحانـي
اعيد النظر بالوقت يمكن يطيب الفـال
احاول اغيّر دنيتـي قـدر الإمكانـي
اسوق القدم مابين رمضا وبين اظـلال
على اللي مضى بالوقت ماني بندمانـي
ترى الدنيا ماتسوى نحسّب لها مثقـال
مادام القدر مكتوب من عالي الشانـي